தக்காளியின் கதை
கொழுக்கு முழுக்கு தக்காளிக்கு
கால் முளைத்ததாம்
கூடத்திலிருந்து வாசலுக்கு
துள்ளிக் குதித்ததாம்
துள்ளிக் குதித்த தக்காளி
தூணில் இடித்ததாம்
தூணிலிருந்து சுவரை நோக்கி
உருண்டு போனதாம்
சுவரில் மோதி மரத்தில் மோதி
அலைந்து களைத்ததாம்
சுருண்டு கிடந்த நாயின் காலில்
இடித்து நின்றதாம்
திரும்பிப் பார்த்த கருப்பு நாய்க்கு
கோபம் வந்ததாம்
தக்காளியைக் கவ்விக்கொண்டு
ஓடி விட்டதாம்
கன்றுக்குட்டி
சின்னச் சின்னக் கன்றுக்குட்டி
சிவப்பு வண்ணக் கன்றுக்குட்டி
துள்ளி ஓடும் கன்றுக்குட்டி
துடுக்குக் காரக் கன்றுக்குட்டி
தோப்பில் சுற்றும் கன்றுக்குட்டி
சுறுசுறுப்பான கன்றுக்குட்டி
கோழியை விரட்டும் கன்றுக்குட்டி
கூடையைக் கவிழ்க்கும் கன்றுக்குட்டி
முட்டத் துடிக்கும் கன்றுக்குட்டி
முரண்டு பிடிக்கும் கன்றுக்குட்டி
அழைத்தால் திரும்பும் கன்றுக்குட்டி
அசைந்து நடக்கும் கன்றுக்குட்டி
தலையை அசைக்கும் கன்றுக்குட்டி
தவலையை உருட்டும் கன்றுக்குட்டி
பாலைக் குடிக்கும் கன்றுக்குட்டி
படுத்துத் தூங்கும் கன்றுக்குட்டி
மீசைக்காரப் பூனை
மீசைக்காரப் பூனை
மிரண்டு ஓடும் பூனை
உருட்டி வைத்த உரலிலே
ஒளிந்துகொள்ளும் பூனை
ஆளில்லாத நேரத்தில்
அலைந்து திரியும் பூனை
கண்ணில் பட்ட பண்டத்தை
கவ்வி ஓடும் பூனை
பாலைக் குடிக்கும் பூனை
பாயசம் நக்கும் பூனை
சட்டியை உருட்டும் பூனை
சாம்பாரைக் கவிழ்க்கும் பூனை
இடுப்பை அசைக்கும் பூனை
எகிறி ஓடும் பூனை
அருகில் நெருங்கிப் போனால்
பறந்து போகும் பூனை
எங்கள் வீட்டுப் பூனை
கெட்டிக் காரப் பூனை
வாவா என்று அழைத்தால்
மடியில் அமரும் பூனை
அப்பாவும்
மகனும்
பள்ளிக் கூடம் கிளம்ப வேண்டும்
எழுந்து வாடா தம்பி
தூக்கக் கலக்கம் நீங்கவில்லை
எழுப்ப வேண்டாம் அப்பா
பல்லைத் துலக்கு, பாலைக் குடிக்கணும்
எழுந்து வாடா தம்பி
கண்ணைத் திறந்தால் நெருப்பாய் எரியுது
எழுப்ப வேண்டாம் அப்பா
குளிக்க வேண்டும், உடுக்க வேண்டும்
எழுந்து வாடா தம்பி
தலையும் வலிக்குது, உடம்பும் வலிக்குது
எழுப்ப வேண்டாம் அப்பா
தோசையும் சட்னியும் தயாராய் உள்ளன
எழுந்து வாடா தம்பி
தொண்டையில் கசப்பு, நாக்கிலும் கசப்பு
எழுப்ப வேண்டாம் அப்பா
விடுப்பென்று தகவல் அனுப்பி விட்டேன்
தூங்கி ஓய்வெடு தம்பி
காய்ச்சலும் போச்சு, களைப்பும் போச்சு
எழுந்து வந்தேன் அப்பா
